Y newyddion diweddaraf am y brechlyn gan Fwrdd Iechyd Prifysgol (BIP) Betsi Cadwaladr:
Dylai pob aelwyd yng Ngogledd Cymru gael llythyr yn esbonio’r rhaglen frechu leol yn fuan. Does dim angen i chi gysylltu â’ch meddyg teulu na’ch bwrdd iechyd lleol am eich brechiad. Byddwn yn cysylltu â chi dros y ffôn neu drwy’r post pan ddaw eich cyfle i gael eich brechu.
Mae 9,654 o bobl yn y grwpiau blaenoriaeth uchaf wedi cael eu dos gyntaf yn ystod yr wythnos ddiwethaf, gan ddod â chyfanswm y trigolion sydd wedi’u brechu i 15,852.
• Mae tair Canolfan Frechu Dorfol ar waith nawr ym Mangor, Llandudno a Glannau Dyfrdwy, yn ogystal â thair Canolfan Frechu mewn Ysbytai – Ysbyty Gwynedd, Ysbyty Glan Clwyd ac Ysbyty Wrecsam Maelor.
Yr wythnos hon, mae BIP Betsi Cadwaladr wedi cael 8,576 dos o’r brechlyn Pfizer BioNTech a 6,300 dos o’r brechlyn Oxford AstraZeneca. Bydd y cyflenwad yn parhau i gynyddu yn ystod yr wythnosau nesaf.
Mae’r grwpiau canlynol yn cael eu blaenoriaethu ar hyn o bryd:
• Preswylwyr a staff cartrefi gofal
• Pobl dros 80 oed, gan gynnwys cleifion preswyl mewn ysbytai
• Staff risg uchel sydd ar y rheng flaen ym maes gofal iechyd
• Staff gofal sylfaenol
• Staff Gwasanaeth Ambiwlans Cymru
• Staff gofal cymdeithasol
Mae’r brechlyn yn cael ei roi i bobl drwy'r Canolfannau Brechu Torfol a’r Canolfannau Brechu mewn Ysbytai yn bennaf. Bydd hyn yn cael ei ategu drwy weithio gyda thimau mewn fferyllfeydd cymunedol, sy’n gallu cynnig rhagor o gyfleoedd i bobl gael y brechlyn mor agos â phosibl i’w cartrefi.
Nod BIP Betsi Cadwaladr yw brechu 90% o’r grwpiau canlynol erbyn diwedd mis Ionawr:
• Preswylwyr a staff cartrefi gofal
• Pobl 80 oed a hŷn
• Staff rheng flaen yr Uned Reoli Sylfaenol
• Staff rheng flaen ym maes gofal cymdeithasol a gofal cartref
• Staff rheng flaen partneriaid gofal eraill
I gael mwy o wybodaeth am y rhaglen frechu, ewch i wefan Betsi Cadwaladr yn
https://bipbc.gig.cymru/covid-19/gwybodaeth-brechlyn-covid-19/
Mae mwy o wybodaeth a chyngor ar gael gan Iechyd Cyhoeddus Cymru.